المواطن المصري بيمارس الرياضة طوال الوقت
.
.
.
.
.
.
بيلعب قفز الحواجز ... عند التزويغ من المدرسة


بيمارس تمارين التنفس ... علي سلالم أى مصلحة حكومية،


بيمارس الجرى ... خلف المواصلات العامة


و بيشارك طوال الوقت فى ماراثون ... أكل العيش،


و بيمارس رياضة المصارعة من أجل الحصول على أبسط حقوقه كمواطن،

و بيلعب الباليه المائى عندما ........تطفح المجارى فى الشارع


كم انــت رشـــــــيق ايها المصرى!!

كلامك يذكرني بقصيدة "عشان انت مصري" التي قرأتها قبل سنوات ووجدتها تصف حال المواطن المصري:



عشان انت مصري


عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عاملك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


*-*-*-*-*

للأمانة: القصيدة لها بقية لكني فضلت حذفها لإحتوائها على إهانة للمصري